Eins og frá var greint í frétt hér á heimasíðunni 11. maí s.l. hefur stjórn FHS í nokkuð langan tíma haft frumkvæði að því að flugsamningsaðili við félagið, í þessu tilviki Plúsferðir, skoði möguleikan á að bjóða íbúðir félagsmanna inn í pakkaferðir í gegnum Alicante flugið.

Í fréttinni kom einig fram að Plúsferðir hafi leitað til Sigurðar Ragnarssonar, formanns FHS, til að aðstoða við að byggja upp þetta verkefni, og að tryggja sem bestan framgang á fyrstu stigum þess.

Stjórn FHS telur mjög  mikilvægt að vandað verði til þessa verkefnis þannig að líklegra verði að á því geti orðið  framhald. Þess vegna var það  mikilvægt að fulltrúi FHS kæmi náið að þessu og gætti á sama tíma hagsmuna félagsmanna.

Rétt er að ítreka að FHS er ekki beinn aðili að þessu verkefni, heldur hefur einungis hvatt til þess og aðstoðað Plúsferðir við að koma því í framkvæmd, en jafnframt  tryggt að einungis er samið við félagsmenn í FHS.

FHS mun áfram vera tilbúið að aðstoða við verkefnið  til hagsbóta fyrir félagsmenn  sína  með því að koma á framfæri hugsanlegum óskum Plúsferða um fleiri eignir til leigu.

Það er einlæg von stjórnar FHS að þetta verkefni takist vel og að þetta muni festa sig í sessi til lengri tíma.

Á stjórnarfundi  14. maí s.l óskaði Sigurður Ragnarsson formaður FHS eftir því að taka sér leyfi frá formennsku í félaginu fram á haust m.a. til að hrinda þessu verkefni í framkvæmd. Stjórn félagsins varð við ósk formannsins og mun Bjarni Jarlsson varaformaður gegna starfi formanns á meðan.

Flugvallaryfirvöld á Alicanteflugvelli hafa hafið breytingar á gamla bílastæðahúsinu, við gömlu flugstöðina. Stefnt er að því að opna þar langtíma bílastæði í júní.

Þessi ráðstöfun hefur mætt andstöðu þeirra sem reka  bílageymslur fyrir utan flugvallarsvæðið, en óneitanlega verður þetta til hagsbóta fyrir bíleigendur sem vilja geyma bíla sína um lengri tíma.

Innan stjórnar FHS hafa komið upp umræður um hvort félagið geti með einhverjum hætti stuðlað að því að félagsmenn okkar eigi fleiri valkosti en nú er varðandi leigu á íbúðum sínum á Spáni, á svæðinu sem tengist Alicante fluginu, og þá hvort hægt væri að tengja þetta eitthvað samstarfi FHS við þá ferðaskrifstofu / flugfélag, sem samið hefur verið við á hverjum tíma, sem gæti jafnframt styrkt samningsaðstöðu FHS um flugið.

Nýlega tóku Plúsferðir jákvætt í þessar hugmyndir og eftir fyrirspurn FHS til félagsmanna í þessu sambandi, kom í ljós að þar var áhuginn mjög mikill.

Plúsferðir leituðu til Sigurðar Þ. Ragnarssonar formanns FHS til að aðstoða við að hrinda þessu í framkvæmd, og varð það úr, enda mikilvægt að hagsmuna félagsmanna sé gætt vandlega í upphafi þessa verkefnis.

Stjórn FHS kemur saman nú á mánudag, og mun þá ræða hina ýmsu fleti á þessu verkefni, sem hún lítur á sem tilraun, sem geti orðið til hagsbóta fyrir mjög marga félagsmenn FHS og feli í sér ákveðna möguleika fyrir félagið sjálft.  

Ágústa Pálsdóttir hafði samband til að láta vita að símaskráin væri tilbúin og klár. Hins vegar nefndi hún að það átti sér stað sá leiði misskilningur að þeir sem ekki skráðu sig að nýju, með sama númer eða breytt, fóru ekki inn. 75% af þeim sem voru í skránni 2008 hafa skipt um númer og því var brýnt að allir myndu skrá sig að nýju.

Reikna má með að Ágústa muni láta sjá sig á næstu hittingum og hafa símaskrána á boðstólnum.

Meðfylgjandi eru myndir af félagslífi Íslendinga á svæðinu. Í gær komu um tuttugu manns á Dominobarinn í Rocajuna og þar af spiluðu tólf á þremur brautum, þ.e. fjórir á hverri braut.

Félagsvistin var svo spiluð í dag á sundlaugarbarnum Bar Piscina í Las Mimosas.

Eins og mörgum er kunnugt, þá hefur Hrafnhildur Ósk Eiríksdóttir í CAM flutt sig um set og er nú aðstoðarútibústjóri í útibúi CAM í San Luis, Torrevieja. Viðskiptavinum hennar frá fyrra útibúi er velkomið að leita áfram upplýsinga hjá henni, en ekki er ætlast til að hún vinni í einstökum málum eins og hún væri enn starfandi þar. Þá er t.d. átt við vinnu varðandi lánabreytingar, endurfjármögnun o.þ.h. því það tilheyrir eðlilega starfsfólki þess útibús, þar sem viðkomandi viðskiptavinur er með bankareikning. Tæpast þarf þó að taka það fram að nýir viðskiptavinir eru að sjálfsögðu velkomnir í viðskipti hjá Hrafnhildi í San Luis.

Keyrt er til San Luis frá Torrevieja eftir Crevillent þjóðveginum (CV-905). Útibú CAM í San Luis kemur í ljós á vinstri hönd nánast um leið og ekið hefur verið til hægri út úr hringtorginu, sem sem merkt er San Luis (þ.e. fyrsta útafkeyrsla úr hringtorginu þegar keyrt er frá Torrevieja). Sími CAM í San Luis er 966 789 182 og tölvupóstfang Hrafnhildar er Þetta netfang er varið fyrir ruslpósti, þú þarft að hafa Javascript virkt til að skoða það .

Nú geta FHS félagar látið bóka sig í fyrirfram ákveðin sæti um borð í flugvélum Plúsferða, aðra leiðina eða báðar, milli Alicante og Keflavíkur. Með þessu má forðast biðraðir, enda á þá fólk sín sæti sem ekki verða af þeim tekin þó viðkomandi mæti með síðari skipunum til innritunar. Þetta er hægt bæði með því að senda tölvupóst á Þetta netfang er varið fyrir ruslpósti, þú þarft að hafa Javascript virkt til að skoða það eða hringja í Plúsferðir 535-2100 og tala við sölumann sem tekur niður óskina og athugar hvað er laust í vélinni. Hið sama á við þurfi fólk á auka farangursheimild að halda.

Upphaflega stóð til að það yrði hægt að gera þetta í gegnum bókunarvél um leið og viðkomandi bókar flugið sitt á innri vef FHS, en af tæknilegum ástæðum hefur það ekki gengið og því varð samkomulag milli aðila að gera þetta svona. Þeir sem þegar hafa bókað flug býðst þetta einnig.

Verðskrá:

Exit sæti: 2.990 kr.
Gluggasæti: 1.490 kr
Miðjusæti: 490 kr
Gangsæti: 990 kr
Aukataska 20 kg: 6.900 kr